Mat 17 | WSK | STEP | Se tom 6 namaram mu te Jesus nu Peter, se John ko uria James ilak, buta nunga giam ale duruk bo kalel biya wore te arungak nama tarigiram.

Matthew 17

Jesus ko kumik lilim la nikim pagam

(Mark 9:2-13; Luke 9:28-36)

1 Se tom 6 namaram mu te Jesus nu Peter, se John ko uria James ilak, buta nunga giam ale duruk bo kalel biya wore te arungak nama tarigiram. 2 Se olekem mu Jesus ariwaman se ko kumik lilim la nikim pagam, se ko koma motam worem iwita nikinang kapakaso, se ko guang mu sirarmam ale nikinang pagakaso. 3 Se Moses Elijah ilak taiman ale Jesus ilak munakawakasan se nungarkaman.

4 Se Peter Jesus maonam, “Kari Biya, ana imi te taiman bagasan mu yawarakala. Se ni ko kuar mu, ani kawam sasal ilagala suwan imi te kalikko, bo nika, bo Moses ko, se bo Elijah ko.”

5 Se tom nu uwuta baluwaram umutang taiti nuwi bo nikinang kapawaram mu tairam nunga iramuram. Se taiti nuwi te kuring bo iwita balam, “Imi mu aninga Kuriang, ani noko ninguru kuesam. Aninga angamang nu ko ko amilmiloso. Se nina noko kuring karo tualko! ^{▼▼Mat 17:5 Jesus mu Kaem ko Kuriang, se Prophet tala, Moses nu tairukko giram balam: Acts 3:22; Deut 18:15.}”

6 Se olekem alo den mu ikiman mu ninguru nguangaman ale aliti dagulaman se nomoke ali ningi kaparam. 7 Bare Jesus tairam nunga kau kau tam ale nunga maonam, “Barasal ale me nguangaralko,” mam. 8 Se nuna nusupuling patowaman ale loagaman se tarigiram mu kari bo ta me aringiman, mu Jesus kota arungak bagaram se ari gilingiman.

9 Ale nuna Jesus ilak peleman duruk luan la kapawa se Jesus nunga maonam, “Nina mel aringiman mu saki alo me nunga maonalko. Kari ko Kuriang tom nu kueruk ale barasuk mu te asele nina mel aringiman mu balalko.”

10 Se olekem alo nu isarman, “ Bare awuk se Law Den ko kausa kari alo Elijah girok tairukko asele Kari ko Kuriang tairukko ma balsan a?” ^{▼▼Mat 17:10 Prophet Malachi nu Elijah aking tairukko ko den sang balam: Mal 4:5-6.}

11 Se Jesus nunga maonam, “Elijah nu girok tairuk mel suen biya nungokko den mu nunguning. 12 Bare ani ninga manorsam, Elijah maingkala tairam, bare kariimet ninguru me ko ikikasan, ale am nunga ikia karo tuman ale moman se kueram. Se munan koma suwanta tala Kari ko Kuriang te ilak betemonko.” 13 Se Jesus iwita balukaso mu te olekem alo ikiman, mu nu Anuwa Kari John ko balukaso maman.

Jesus kuriang bo bur memek karogo wore nungam

(Mark 9:14-29; Luke 9:37-42)

14 Se tom nuna kariimet motam biya nongote peleman taiman mu kari bo tairam ale Jesus koma te bugura kulukuam, 15 ale balam, “Kari Biya, ni aninga kuriang ko neman batagukko,” mam. “Tom suen biya nu ngualoso ale ali awete daguloso ale barawara karu karu maso. Se tom saki mu tama ningi se yu ningi daguloso. 16 Se ani ilak nika olekem alo nongote namerem, bare nuna nungurmonko me terong se ani ni karkikko tairem.”

17 Se Jesus balam, “Nina tom imi ko kariimet nengemang ningi nunguning mena, se nengemang aora biya! Ani tom awila nina nengerak bagirik se nengemang ningi nunguning arukko ya? Ani tom awila nenenga ikup giekko? Aria, kuriang diruwural ilak aningate tairalko.” 18 Se ilak taiman se Jesus bur memek kumik ningi aniram mu sail te maonam se aratam, se kuriang tom umutang te la nungeram.

19 Se udagi, tom Jesus kota bagaram, mu olekem alo kote taiman ale isarman, “Awuk se ana bur memek owore karonakko me terong?”

20 Se nu nunga maonam, “Mu duap nenenga nengemang ningi nunguning mu katirta se nina me terong maman. Bare ani nunguningta ninga manorsam, nenenga nengemang ningi nunguning tam mustard ko muguri iwita, gotektir nunguningkiri, bare mu nina duruk imi maonal, ‘Bares owola kasu namarko,’ mal, mu nu am kasu namurukko. Se mel mu te la mena, mu ura aguwaya mu am te bita saparalko. 21 ^{▼▼Mat 17:21 Den saki girakala batagorman mu te den imi ago aniso: “Lage bo ta bur memek iwita mu te kaora ko mu mena, bare ngatangara te se na inang ko nigiring kaola te mu asele.”}”

Jesus kueruk ale barasukko den akingtala balam

(Mark 9:30-32; Luke 9:43-45)

22 Nuna Galilee sor te geragawa se Jesus ko olekem nunga maonam, “Nuna Kari ko Kuriang ilumon ale kari saki nuguting te betemon, 23 se momon se kuerukko. Bare tom ilagala suwan mu te aking barasukko.” Se ko olekem alo den mu ikiman ale ninguru nongomang batagakaso.

Jesus mu Kaem ko Kuriang, bare temple ko takis diaram

24 Se Jesus ko olekem alo arungak Capernaum nama arataman. Se mu te temple takis tata kari Peter kote taiman ale isarman, “Nenenga kari biya temple ko takis me beteso ye?”

25 Se Peter balam, “Se pa, mu beteso pa!” mam.

Se tom Peter kawam ningi kasu naguram, mu Jesus giram ale iwita isuam, “Simon, ni awuk ikisam a? Ali ko king alo mu nongota nunga kuriang nongote takis tasan agi, kariimet saki alo nongote takis tasan e?”

26 Se Peter balam, “Mena. Mu kariimet saki alo nongote la takis tasan,” mam.

Se Jesus balam, “Butata se king nunga kuriang alo takis me diasan,” mam. ^{▼▼Mat 17:26-27 Jesus mu King se Kaem ko Namar. Se nu takis diarukko iwita mena. Takis diara ko munan: Rom 14:19,21.} 27 “Bare ana temple takis me dianak se nongomang ikuwurok bore ko se am dianakko. Se ni langi namar ale aul sapar ale wal motam motam tagir mu to ale, kuring pagaru, ale manga bo kuring ningi baguruk se arik umutang to ale karogo nama nungaruko. Manga umutang mu ni analak nanga takis karogo terong maukko.”